ఆనందగురు

తత్వాలు

2009-11-27T16:09:00.002+05:30

***ఓం***

తానుండడని తెలుసు

వాడుండడని తెలుసు

తెలిసి చూసేదెవ్వడు

తా కనుమూయు లోపు

***ఓం ***

తనను తెలిసి

తెరను విడుచు

ఉనికి మిగుల

తెరగ నిలుచు

***ఓం***

తాపసులకు దండం

తామసులకు దండం

***ఓం***

తర్కం-నమ్మకం

2008-11-13T11:59:00.006+05:30

*
"యద్ భావం తద్ భవతి "

మన భావాన్ని అనుసరించి మనముంటాము.

పూర్వ గ్రంధాలలో రాసినదంతా ఆచరణీయం కాకపోయినా, ఆ గ్రంధాల
కాలాన్ని బట్టి ,వాటిలో నాయకులు అనుసరించిన మార్గం అనుసరణీయం.
మిగిలిన పాత్రలన్నీ వాటి గుణగణాల ద్వారా నాయకునికి అనుకూలంగానో,
వ్యతిరేకం గానో వ్యవహరిస్తాయి.

అక్కడ చిన్నగీత,పెద్ద గీత పద్దతి ఉండచ్చు,

లేదా అన్ని గీతలు కలిసే మహబిందువు కధానాయకుడు అవ్వచ్చు.

గెలిచిన వారిని అనుసరించటం వల్ల ఏ మార్గాన వెళితే విజయం లభిస్తుందో
తెలుస్తుంది.

ఓడిన వారిని అనుసరిస్తే ఏ మార్గాన పోకూడదో మాత్రమే
తెలుస్తుంది. వారిది "నేతి, నేతి " (ఇది కాదు, ఇది కాదు ) పద్దతి .
తిప్పి ముక్కు ఎక్కడుందో చూపించటమన్నమాట.

నాయకులను అనుసరించే వారిది "ఇతి,ఇతి "(ఇదే,ఇదే ) పద్దతి .
వీరు ముక్కుసూటి వారు .తొందరగా గమ్యాన్ని చేరతారు .

నేతి వారు కొంచం నెమ్మదిగా చేరతారు.

ఈ పయనములో నేతి వారు ఎక్కువ శక్తిని కొల్పోతారు,అన్నిమార్గాలను
పరిశీలించుకొంటూ ముందుకు వెళ్ళాళ్సి రావటం వల్ల.

ఇతి వారు నమ్మకముతో ఒకే మార్గములో ముందుకు దూసుకు వెళతారు.

ఈ రెండు మార్గాలను మనం నమ్మకం ,తర్కం అని అంటాము.
నమ్మకం భద్రతను ,మానసిక శాంతిని సూచిస్తే ,తర్కం అశాంతిని దూరం
చేసుకోవటానికి మనిషి తన పరిధిలో ప్రయత్నించటాన్ని తెలియచేస్తుంది .
నమ్మకములో ఇతరుల అనుభవాన్ని ప్రాతిపదికగా తీసుకొంటే ,తర్కం లో
తన పరిధి లో సమాధానాలు వెతికే ప్రయత్నం కనిపిస్తుంది.

మరి రెండింటిలో ఏ దారిన వెళ్ళాలి ? ,

మన తర్కాన్ని అనుసరించి గమ్యానికి తగిన నాయకుడినో ,గురువునో
మన పరిధిలో పరిక్షించి ,ప్రశ్నించి మనసుకు తృప్తి కలిగిన తరువాత
వారిపై నమ్మకం తో అనుసరించాలి .

ఇదే గురు (పెద్దదైన,గొప్పదైన) మార్గం.

ఈ మార్గాన్నిఅనుసరించినవారే విజయాన్నిఅవలీలగా కైవశం చేసుకోగలరు .

జయ జయ ఆనందగురుం

సామాన్యుడు--- సాధువు

2008-09-30T14:38:00.004+05:30

గుణాదోషా దోషాగుణా ఏషాం తేన్యైహి దేహినః

భవంతి సాధవో ఏషాం దోషాదోషా గుణా గుణా

సామాన్యులకు గుణములు దోషములుగా , దోషములు గుణములుగా కనిపిస్తాయి .

సాధువులకు దోషములు దోషములుగానే , గుణములు గుణములు గానే కనిపిస్తాయి.

సామాన్యుడు సాధన చేత సాధువుగా మారవచ్చు .

జయ జయ ఆనందగురుం

సీత అగ్నిప్రవేశం --మూలాలు -నా దృష్టి కోణం

2008-09-29T10:21:00.023+05:30

వేలసంవత్సరాలుగా మన జీవన స్రవంతి లో భాగం వాల్మీకి రామాయణం.రామాయణాన్ని ఎన్నో వేలమంది కవులు వారికి అర్ధమైన రీతిలో వ్యాఖ్యానించారు. వేల రామాయణాలు పుట్టాయి .కాని అన్నింటికి పెద్దన్నగా వాల్మికి రామాయణమే నేటికీ నిలచిఉంది. రామాయణాన్ని ఎవరు రాసారు అంటే ,వాల్మీకి అనే నేటికీ మన మొదటి సమాధానం .

ఈ క్షణం లో ,నదీ ప్రవాహం లో ఉంచిన నా పాదం ,మరుక్షణం లోని నా పాదం ఒకటి కావని తెలుసు కోవటం తో నేను ఆగిపోను .ఈ జరిగే మార్పులను గమనిస్తూ ,తాను మారకుండా నిలచిఉండే సాక్షి
ఎవ్వడో అనేది కూడా నాకు కావాలి.

ప్రతి మనిషికి ఒక పరిధి ఉంటుంది . మనిషి యొక్క అనుభవం వల్ల నిత్యం ప్రభావితమౌతుంది . ఆలోచన, అనుభవం ,జ్ఞానం ఒకదానిపై ఒకటి ఆధార పడి ఉంటాయి. ఒక స్థాయి లో మూడు ఒకటిగానే కనిపిస్తాయి.

చరిత్ర లో అగ్రేసరులు , అనుచరులు ఇద్దరు ఉంటారు. ఎవరిలో అయితే అనుచరులందరిని ఏకీకృతం చేసి ఒక లక్ష్యం వైపు నడిపించే శక్తి ఉంటుందో , వారే అగ్రేసరులవుతారు.ఏ ఉద్యమమైనా "తన" నుండి మాత్రమే మొదలవుతుంది .తన బాధ,తనచుట్టూ ఉన్న ప్రపంచం బాధ ఒక్కటేనని గ్రహించి తాను ముందుండి ప్రపంచాన్ని విముక్తి దిశగా నడిపించేవాడు లోక పూజితుడవుతాడు.

వాల్మీకి కధానాయకుడు రాముడు,గౌతమ బుద్దుడు ,గాంధీ అందువల్లే లొకనాయకులయ్యారు .

క్షణ క్షణం మారే అనుభవము,దానిని అనుసరించి మనలో మార్పు చెందే సత్యభావన(అర్ధం చేసుకునే విధానం ) శాశ్వతమా ? లేక సాపేక్షం గా మనకంటే ఎక్కువ కాలం నుండీ ఉనికి కలిగినది ,నిరంతర ప్రవాహశీలం గా లోకంలో వ్యాపించినది ,మన భావాలకు మూలం అయిన రామాయణం శాశ్వతమా ?

"నా " వైపు నుండీ మొదటిది.

"మన" వైపు నుండీ రెండవది .

నా పరిధి పెరిగితే "మనం".

మన పరిధి తరిగితే "నేను".

నా పయనం కూడా వ్యష్టి నుండీ సమిష్టి వైపుకే .

ఆ పయనంలో ప్రతి వ్యక్తికి ,ప్రతి విషయానికి సముచిత స్థానం లభించాలన్నదే నా కోరిక .

సమన్వయము నోచుకోని విశ్లేషణలు వ్యర్ధమని నా అనుభవం ,నమ్మకం .

అందువల్లే సీత లక్ష్మణుని పై ఉపయోగించిన పరుష పదజాలం ,శ్రీరాముని పదాలను కలిపి చదవమన్నది .

యాగాగ్ని నుండి వచ్చిన పాయసం వల్ల పుట్టిన శ్రీరాముడు , అదే అగ్ని చేత సీత పవిత్రతను లోకానికి తెలియ చేయాలనుకోవటం అమానుషమే ( మనిషి చేయనిది ), కాని విచిత్రమేమీ కాదు.

సీత కోసం ఎంతగానో తపించిన శ్రీరాముడు ,ఆమెతో పరుషంగా మాట్లాడింది ఈ ఘట్టం లోనే .
రామాయణం లో ఇంకెక్కడా వినపడవు .

ఈ విషయం పై చర్చ లో , నాగరాజు గారిచ్చిన వివరణ బాగుంది .నాగమురళి గారి వంశ కధనం
చాలా బాగుంది.మహేష్ గారి " వ్యక్తి " త్వం నచ్చింది .

సుజాత గారు ! తొందరలో వివరంగా రాయటానికి ప్రయత్నిస్తాను .

జయ జయ ఆనందగురుం

సీత అగ్ని ప్రవేశం - మూలాలు

2008-09-26T15:52:00.014+05:30

ఏ గ్రంధము నైనా పరిశీలించేటప్పుడు, మనము ఆ గ్రంధాన్ని పూర్తిగా చదవాలి. అప్పుడే మనకు సరియైన అవగాహన లభిస్తుంది . మన కళ్ళతో కాక , రచయిత దృష్టి కోణం నుండీ చూడాలి . వాల్మీకిమహర్షి బాల కాండ లో కావ్య ప్రయోజనాన్ని స్పష్టంగా తెలియజేసారు .అది రావణ సంహారము. ఎవరివల్ల ? . వాల్మీకి మహర్షి ,నారదుల వారిని " నేను చెప్పే ఈ శుభ లక్షణాలు కల్గిన వ్యక్తి లోకంలో ఎవరైనా ఉన్నారా " అని అడిగితే ," ఉన్నాడు , ఆయనే రాముడు " అని చెప్పబడిన వ్యక్తి చేత .అంటే అన్ని శుభ లక్షణాలకు ప్రతీకగా రాముని మన ముందు నిలిపారు . ఇదే వాల్మీకి మహర్షి తన రామాయణం ద్వారా సాధించాలనుకున్న ప్రయోజనం. ఆదిలోనే చెప్పబడిన ఈ విషయాన్ని మరచి ఎన్నో చర్చలను ,తర్కాలను ఆశ్రయిస్తున్నాం.అందమైన పుష్పం , రేకు రేకుగా విడదీస్తే అందం అలాగే నిలిచి ఉంటుందా ?. కవి ఆశించిన ప్రయోజనాన్ని మరచి కావ్యాన్ని ముక్కలుగా చేసి పరిశీలించటం ఎంతవరకు సబబు ?. దయచేసి ఆలోచించండి .

సీత అగ్ని ప్రవేశానికి ,దానికి ముందు రాముడన్నమాటలకు మూలాలు రామాయణం లో ఎక్కడ వున్నాయో తెలుసా ?.

సీతాపహరణానికి ముందు ,లక్ష్మణుని తులనాడుతూ సీత పలికిన పరుష వాక్యాలలో .

ఇదే మాటలను రాముడు సీత తో అన్నాడు అగ్ని ప్రవేశానికి ముందు.

రాముని క్రోధం,రాముని మాటలు సీత శంకను దూరం చేయటానికి.

జాగర్తగా రెండింటినీ కలిపి చదవండి వాల్మీకి రామాయణము లో .

ఆ తరువాత మనకు అర్ధమైన దానిని పంచుకోవటం ద్వారా రామాయణం పట్ల
మన అవగాహనను పెంచుకుందాము ,సరిచేసుకొందాము .

జయ జయ ఆనందగురుం

వ్యక్తిత్వ వికాసం -- ఆధ్యాత్మిక గ్రంధాలు

2008-09-25T10:48:00.012+05:30

ఈ రోజుల్లో ఎంతో ప్రాధాన్యత సంతరించుకున్న మాట "వ్యక్తిత్వవికాసం "(personality development).మరి దానిని గూర్చి మన ఆధ్యాత్మిక గ్రంధాలు ఏమైనా చెప్పాయా ?. ఐతే ఆ విషయాలు ఈ కాలం లో మనకు ఉపయోగిస్తాయా?. అవును అనే మా గట్టి సమాధానం .

మన పెద్దలు "ఇష్ట ఫల ప్రాప్తి కోసం ,అనిష్ట ఫల పరిహారం కోసం " శాస్త్రాలను అధ్యయనం చేయమన్నారు .

రాముని బాటను, కృష్ణుని మాటను అనుసరించమన్నారు.

మన ఆధ్యాత్మిక గ్రంధాలు అందించిన వ్యక్తిత్వ వికాస సూత్రాలను వారం వారం రెండు టపాలలో అందించాలని మా ప్రయత్నం .ఇదే విషయం పై ఈ బ్లాగులో రాసిన పాత టపాలు :

1.విజేతలు-పరాజితులు

2.దేవతలు - రాక్షసులు

3. కష్టపడితేనే ఫలితం

వీటిని కూడా ఒక్కసారి చదవండి.

జయ జయ ఆనందగురుం

కష్టపడితేనే ఫలితం

2008-09-23T11:55:00.004+05:30

ఏ పనిని సాధించటానికైనా పురుష యత్నం ,దైవానుగ్రహము రెండూ కావాలి.

తన శక్తిని అనుసరించి కార్య సాధనకు చివరి వరకు ప్రయత్నించటమే పురుష యత్నం .

పురుష యత్నం వల్ల సాధింపబడని కార్యాన్ని ,భగవంతుని సహాయం వల్ల సానుకూల
పరచుకోవటమే దైవానుగ్రహము .

ఈ విషయాన్ని అద్భుతంగా ఆవిష్కరిస్తుంది భాగవతం లోని "గజేంద్ర మోక్ష ఘట్టం " .

గజేంద్రుడు తన శక్తి అంతటినీ ఉపయోగించి మొసలి పట్టు నుండీ బయటపడాలని ప్రయత్నించాడు.
తనవల్ల కాదని తెలిశాక భగవంతుని ప్రార్ధించి ఆయన అనుగ్రహం వల్ల తప్పించుకోగలిగాడు .

అంటే మొదట మానవ ప్రయత్నం జరగాలి .ఆ ప్రయత్నం లో మన శక్తి ని పూర్తిగా వినియోగించాలి .
ఆ తరువాతే దైవానుగ్రహం లభిస్తుంది .

ఉపవాసము --ఉపాసన

2008-09-21T20:30:00.000+05:30

ఉప వసతి ఇతి ఉపవాసః అంటే భగవంతునితో కలసి వసించటం(ఉండటం) .భగవత్ చింతనతో కాలం గడపటం .అంతేగాని ఆహార నియమాలకు ఎక్కువ ప్రాముఖ్యత నివ్వటం సరి కాదు .

ఉపాసన (ఉప + ఆసన ) అంటే భగవంతునికి దగ్గరగా ఉండటం .ఆయనయందే దృష్టి లగ్నమవ్వటం .

ఉపవాసము ఒకే ఇంటిలో ఉండటం తో సమానం . ఉపాసన అంటే (ఇంటి )వారితో కలసి ప్రక్కనే కూర్చోవటం .

దేవతలు--రాక్షసులు

2008-09-20T10:42:00.000+05:30

లోకహితం కోసం ,ఆత్మరక్షణకు మాత్రమే ఆయుధాలు ధరించేవారు దేవతలు.స్వయముగా యుద్దాన్ని
ఆరంభించరు .

స్వలాభం కోసం ,బలప్రదర్శన కోసం , నిష్కారణంగా ఇతరులను హింసించి ఆనందించేవారు రాక్షసులు .

కర్మను అనుసరించే ఫలితం ఉంటుంది .

రాక్షసులు అందుచేతనే ,వారి హింసా మార్గం లోనే సంహరించబడతారు .

దేవతల మార్గాన్ని వివరించటం, అనుసరించమని చెప్పటమే మన శాస్త్రాల , పురాణాల లక్షణం .

విజేతలు--పరాజితులు

2008-09-19T10:17:00.000+05:30

లోకం గెలిచిన వారిని ఆదర్శంగా తీసుకోమంటుంది .ఓడిన వారిని అనుసరించవద్దు అంటుంది. ఎందుచేత ?

ఏ మార్గాన్ని అనుసరించటం వల్ల విజయం లభిస్తుందో విజేతల నుండి నేర్చుకోవాలి .

ఏ మార్గాన్ని అనుసరించ కూడదో పరాజితుల జీవితం తెలుపుతుంది .

అందువల్లనే రాముని,కృష్ణుని మనమందరం పూజిస్తున్నాం .

జయ జయ ఆనందగురుం

కొరియా లో సంకల్పం

2008-09-18T12:09:00.000+05:30

సంకల్పం లో దేశ,కాలాలను స్మరించటం యొక్క ముఖ్య ఉద్దేశ్యం మన ఉనికిని చెప్పుకోవటమే.
గోత్రం ,ప్రవర కూడా అంతే.వీటి ద్వారా మన మూలాలను ,మన స్థితి తో కలిపి స్మరిస్తాము.మనమున్న భౌగోళిక పరిస్థితులను ,కాలప్రమాణాన్ని సంకల్పంలోనూ ,మన వంశం లోని ప్రసిద్ద ఋషులను లేదా ప్రసిద్దమైన ఇతర విషయాలను గోత్రం గాను చెప్పుకుంటాము .ప్రాచీనకాలం లో మన రామాయణం ,భారతం ,ఇతర పురాణాలలో వర్ణించిన భౌగొళిక స్థితి నేడు అలాగే నిలచి లేదు .చాలా మార్పులు జరిగినాయి.పర్వతాలకు,నదులకు,ప్రదేశాలకు ఇప్పుడు పేర్లు మారినాయి.

అందువల్ల మనమున్న చోట సాపేక్షంగా చిరంజీవత్వం కల్గిన పర్వతాలు,నదులు,ప్రదేశాలను సంకల్పంలో చెప్పుకోవచ్చు.కొరియా దేశ పటాన్ని చూసి సంకల్పం ఎలా చేయాలో చెబుతాను.

ఓం పూర్ణమదః ......... శ్లోక భావం

2008-09-17T11:15:00.000+05:30

ఓం పూర్ణమదః పూర్ణమిదం,
పూర్ణాత్ పూర్ణముదచ్యతే ,
పూర్ణస్య పూర్ణమాదాయ,
పూర్నమేవావసిష్యతే .

అది పూర్ణం .ఇదీ పూర్ణం .పూర్ణం నుండి పూర్ణం జనించింది .పూర్ణం నుండి పూర్ణం విడిపోయినా పూర్ణం నిలచియుంది .

ఇక్కడ అది అంటే రెండు అర్ధాలను భావన చేయవచ్చు.

ఒకటి జగత్తు .రెండు జగత్తు కు ఆధారమైన భగవంతుడు .

జగత్ పరంగా :కనుపించని జగత్తు పరిపూర్ణం.కనిపించే ఈ జగత్తూ పరిపూర్ణమే .కనుపించని ఆ జగత్తు నుండి కనుపించే ఈ జగత్తు ఉద్భవించింది .మనకు కనుపించే ఈ జగత్తు విడిపొయినప్పటికి కూడా ,ఆ కనుపించని జగత్తు పరిపూర్ణముగానే ఉంది .

జగత్ స్వరూపం అంతా ఒక్కటే .దృష్టి బేధం మనది.

భగవానుని పరంగా :భగవత్ స్వరూపం అంతటా నిండిఉన్నదని ,సర్వమూ ఆయన యొక్క పరిపూర్ణ స్వరూపమే అని భావం.

అపరిపూర్ణతకు మాయా జనిత దృష్టి భేదం వల్ల ఉనికి ఉంటుంది.

జయ జయ ఆనందగురుం .

సూర్య శ్లోకం

2008-09-16T11:31:00.000+05:30

ఉదయే బ్రహ్మరూపశ్చ,మధ్యాహ్నేతు మహేశ్వరః అంతకాలే స్వయంవిష్ణుః.

సూర్య బింబ(కిరణ) స్వరూప వర్ణన చేసే శ్లోకమిది .

ఉదయ భానుని లేత కిరణాలు బ్రహ్మ స్వరూపం గా, మధ్యాహ్న కాల మార్తాండుని ప్రచండ తాపం తో కూడిన కిరణాలు మహేశ్వర స్వరూపం గా ,అలసిన శరీరాలకు హాయి నొసగి విశ్రాంతి కి కారణమయ్యే సాయం సంధ్యా కిరణాలు విష్ణు స్వరూపంగా భావన చేయబడింది .

ఈ శ్లోకం సూర్య శక్తి వర్ణన కు మాత్రమే ఉద్దేశించబడింది.

బ్లాగులోకవాసులకు చిన్న విన్నపం

2008-09-15T15:28:00.000+05:30

అంతర్జాలం లో బ్లాగు లోకంలో ఆధ్యాత్మిక విషయాల గురించిన ఎన్నో సైట్లు ,బ్లాగులు చూసిఉంటారు. మీరు కోరుకునే ,మీకు కావలసిన విషయాల గురించిన జ్ఞానం వాటి ద్వారా లభిస్తోందా ?
ఈ బ్లాగు ద్వారా మీ సందేహాలకు సమాధానాలు , విషయ జ్ఞానం అందించాలని మా కోరిక. మీరు మీ ప్రశ్నలను ఈమెయిల్ లో లేదా వ్యాఖ్యల రూపం లో పంపండి . పరిజ్ఞానం కల్గిన వ్యక్తుల నుండి విషయ సేకరణ చేసి మీకు అందిస్తాము.

జయ జయ ఆనందగురుం.

అద్వైతం

2008-09-12T19:13:00.000+05:30

అద్వైతం:అ+ద్వైతం.

ద్వైతం అంటే "రెండింటితొ కుడినది" అని అర్ధం.

అద్వైతం అంటే "రెండు కానిది" అని అర్ధం.

అయితే ఆ రెండు ఏవి ?

పరమాత్మ ,జీవాత్మ.

మన భాష లో దేవుడు ,జీవుడు .

దేవుడు అంటే అనంత జీవ చైతన్యం

జీవుడు ఆంటే దేహం లోని దైవం

అంటే దేవునికి , జీవునికి అభేదమే అద్వైతం.

ఈ టపాపై చర్చ కు వేదిక గా మా బ్లాగును ఉపయోగించండి .